चीर बेहोसी

यो बेहोसीमा, होस पनि बेहोस छ।

मानौँ, रातो रङ्गको नदीमा,
यौटा रङ्ग विहीन पानीको थोपा झरे पछि,
त्यो थोपा पनि रातो बन्छ।

यो बेहोसीमा, होस पनि बेहोस छ।

चीर निन्द्रा सुत्ने हरूको ठाउँमा,
घामको झुल्काले उज्यालो को काम गर्दैन।
चीर निन्द्रा सुत्नेलाई,
उज्यालो सँग कुनै सरोकार छैन।

यो बेहोसीमा, होस पनि बेहोस छ।

खाना बोक्न बनिएका,
कामदार कमिला हरू,
अमृतकै थोपा बोके पनि,
अकालमै मर्ने छन्।

यो बेहोसीमा, होस पनि बेहोस छ।

ज्वालालाई हावा सँग चल्नु छ भने,
निभ्नु पर्छ।
हावालाई  ज्वाला सँग चल्नु छ भने
बल्नु पर्छ।
निभ्न सजिलो रैछ....

यो बेहोसीमा, होस पनि बेहोस छ।

माटो फेरिए पछि,
कुनै बिरुवा रुख बन्छन,
कुनै लास........

यो बेहोसीमा, होस पनि बेहोस छ।