जाडोमा तिमि

तिम्रो तापक्रम मलाई कण्ठस्त छ।
डीग्रीमा हैन,
सबै कुरा डिग्रीले तुलना गर्न मिल्दैन।

तिमि ठ्याक्क त्यति तातो छौ,
जति तातो मनलाई नै तातो पार्ने,
मनतातो पानिमा नुहाउदा महसुस हुन्छ।
शावर बन्दै गर्न मन लाग्दैन।

तिमि ठ्याक्क त्यति तातो छौ,
जति तातो जाडोको बिहानीको ओछ्यान हुन्छ,
समाए पछि छोड्नै मन लाग्दैन, तिम्रो हात।

कहिले काही त यति तातो भैदिन्छौ  कि,
बिहानीको तातो कफी।
सुरुप सुरुप पर्दाको आँतनै तातो पार्ने,
अनुभूति भैदिन्छौ।

तर कहिले काहीं चै
चिसो,
सेलाएको कफी पिउनु परे जस्तो,
अनि बिहान ठिहीराउदै,
भुइमा झरेको ब्लान्केट टिप्नु पर्या जस्तो।

कहिले त झन् यति चिसो कि,
तातोले नुहाउदा नुहाउदै
झुक्केर,
धारा उल्टो बटार्दा,  एक्कस्सी ठण्डी पानि झरे जस्तो।

तिम्रो चिसोपन पनि मलाई कण्ठस्त छ.....

|| अभिनव मञ्जरी ||